Ma teɣliḍ, medden akk inek;
Ma trebḥeḍ ḥedd ur k-yissin;
Akka i ak-d-iban lqum.
Ad tseggem ddunit yis-k,
Lukan am kečč ttilin;
Ad as-tekkes nnuba i umcum.
Ay telhiḍ am warezg-ik,
Lukan am kečč ttilin:
Ssber d-yettbanen ɣef wudem-ik,
Yettak lǧehd i umuḍin ;
Lxir i yezreɛ ufus-ik,
Medden, seg-s, ttawin.
Ddunit, ma trebḥeḍ fell-as,
Tban-d d ajuǧǧeg n wussan.
Lmut, ma trebḥeḍ fell-as,
Tban-d d inig ameqqran
Ideg yal wa, ad yaf ayla-s
Akked zzhu mebɣir lawan.
Ma nesteqsa-k ɣef usirem,
Nettaf-it-id ɣer ɣur-k.
Ma nestaqsa-k ɣef lhemm,
Nettaf-as-id ddwa yis-k.
Tamurt-ik, ur tesɛi isem;
Yal tamurt, amzun inek.
Ur tqebbleḍ tiseɣlit,
Ulac ẓẓerb i wul-ik,
Neɣ lxilaf di tnaslit,
Ama yecbeḥ neɣ berrik.
Γur-k, yemma-k, d ddunit;
Lɛibad-is d atmaten-ik.
Nesteqsa-t ɣef ddin-is,
Ad neddu yid-s, ad t-netbeɛ
Ad nẓer amek iga isem-is,
Isem-is nnbi s yettẓalla
Mi nettraǧu lewjab-is,
Yezzi akkin udem-is, yeḍsa.
Ayt Mengellat,
Tasfift: Acimi, 1989